सागर चन्द

देश दुनियाँलाई खबर देखाउन हिँडेका उनी आफ्नै घरको खबर भने अरुबाट लिइरहेका थिए । मेलम्ची बजारमा उनी जति जनासँग कुरा गर्थे तिनले पहिला आफ्नो पीडाभन्दा दुलालको पनि घर खेत डुबेको सुनाउँथे । ‘बारम्बार आफन्तहरूले मेरो पनि घर डुबेको सुनाउँदा छटपटी भइसकेको थियो,’ दुलालले सुनाए, ‘डुबेकै भए पनि आफ्नो घर हेर्न आतुर भइसकेको थिएँ ।’ तर, उनको रिपोर्ट अझै पूरा भइसकेको थिएन ।

१ असार राति सिन्धुपाल्चोकको मेलम्ची बजारमा इन्द्रावती र मेलम्ची नदीको बाढी पस्यो । बजार पसेसँगै नदीले आफ्नो रौद्र रूप देखायो । ७ जनाको मृत्यु नै भयो । ६० भन्दा धेरै घर डुबानमा परे । सयौं रोपनी खेतीयोग्य जमिन बगर बन्यो । राजधानी काठमाडौंबाट धेरै पत्रकारहरू बाढी प्रभावित क्षेत्रको रिपोर्टिङ गर्न मेलम्ची पुगे ।

बाढीले अस्तव्यस्त बनाएको मेलम्ची बजारमा पुगेर रिपोर्टिङ गर्नेमध्येका एक हुन्, जगन्नाथ दुलाल । न्युज २४ टेलिभिजनका पत्रकार क्यामेरा अगाडि उभिएर बोल्न थाले, ‘यो बजार, सडक बालुवा र पानीले भरिएको छ । दर्शकवृन्द यहाँको अवस्था अहिले भयावह छ । सधैँ भिडभाड हुने यो बजार एकाएक बगर भएको छ ।’

यसो भनिरहँदा उनी मेलम्ची बजारको पुछारमा रहेको आफ्नो घर सम्झिरहेका थिए । उनी सुनाउँछन्, ‘म रिपाेर्ट बनाइरहेको थिएँ । मेरो ध्यान भने घर के भयो भन्नेमै थियो ।’

मेलम्ची बजार पुगेलगत्तै उनी आफ्नो घर गएनन् । घरको अवस्था नहेरिकनै रिपोर्टिङमा खटिए । बाढी आएकै राति उनले आफ्नो सात रोपनी खेत डुबाएको थाहा पाइसकेका थिए । घर डुबानमा परेको चाहिँ यकिन भएको थिएन ।
मेलम्चीकै बासीन्दा दुलाल आफ्नै र नातेदारको घरखेत डुबाएको रिपोर्ट बनाउन खटिए । मेलम्चीका अधिकांश बाढी पीडित उनकै आफन्त, परिवारजन र छिमेकी थिए ।

बुम माइक र क्यामरा लिएर उनी जसै बाढी पीडितलाई राखिएको इन्द्रेश्वरी विद्यालयमा पुगे, त्यहाँ उनले आफन्त नै आफन्त देखे । परिवारका सदस्य देखे । छिमेकी भेटे । ‘बाढी पीडित आफन्त वा चिनजानका मात्रै देख्दा आफैलाई सम्हाल्न गाह्रो भयो,’ दुलालले अनुभव साटे ।

विद्यालयको आँगनमा बाढी पीडितहरू भातका लागि थाल थापिरहेका थिए । अधिकांश बाढीपीडितले १ असार साँझको छाक खान पाएका थिएनन् । विद्यालयको कोठामा बाढी पीडित भरिएका थिए ।

शिलापत्र डटकमबाट साभार
https://shilapatra.com/detail/60649?fbclid=IwAR03npZFlLWALEd1sorx3TmWKrh-Dh1cc45fpGzRiEK7CINV826hhnvy-B8

प्रतिक्रिया

सम्बन्धित खवर

ताजा समाचार

लोकप्रिय

%d bloggers like this: